Ресей мен Қытайды Қазақстан арқылы жаңа маршрут байланыстырады

Қазақстан Ресей мен Қытайды жаңа көлік қатынасымен байланыстырады. Бұл туралы LS-ке көлік министрлігінде егжей-тегжейі айтылды.

Көлік министрлігінің мәліметінше, бұл байланыс трансшекаралық Ертіс өзенінің мультимодальды транзиттік дәлізін дамыту есебінен мүмкін болмақ.

Осы жобаны іске асыру шеңберінде Павлодар – Семей учаскесінде қосымша шлюз, Шығыс Қазақстан облысындағы Тұғыл өзен порты және Тұғыл – Майқапшағай темір жолын салу жоспарлануда. Осы маршрутты дамыту бойынша жол картасы әзірленуде. Онда жобаларды іске асыру бойынша кезең-кезеңмен шаралар көрсетіледі.

"Ресей – Қазақстан – Қытай мультимодальды транзиттік дәлізін іске асыру тасымалдау көлемін 3,6 млн тоннаға дейін ұлғайтуға мүмкіндік береді", — деп түсіндірді көлік министрлігінде.

Сондай-ақ, Атырау – Жайық – Каспий каналы – Транскаспий халықаралық көлік бағытын дамыту пысықталуда. Ол үшін Жайық-Каспий каналын тереңдету жоспарлануда.

Бұған дейін, LS редакциясы Қазақстан Қытаймен өзен тасымалын жолға қоя алатынын хабарлаған болатын.